Ikipe ya Musanze mu bagore n’iya Karongi mu bagabo zegukanye Shampiyona ya Sitball y’umwaka w’imikino wa 2023/24 nyuma yo kwitwara neza mu mikino ya nyuma yabaye ku wa Gatandatu, tariki ya 2 Werurwe.
Iyi mikino yose isoza umwaka w’imikino yabereye kuri Stade y’Akarere ka Bugesera.
Shampiyona yatangiye mu Ukwakira 2023, ikinirwa mu turere dutandukanye bitewe n’aho amakipe abarizwa, aho yakinwe mu byiciro (iminsi) bitatu.
Nyuma y’Umunsi wa Gatatu, amakipe atanu ya mbere yahise abona itike yo gukina imikino y’uwa Kane ari na wo wagaragaje atwara ibikombe mu bagabo n’abagore.
Mu bagore, igikombe cyegukanywe n’Ikipe y’Akarere ka Musanze nyuma yo gutsinda imikino yose naho mu bagabo gitaha i Karongi.
Karongi yatsinze Rulindo ibitego 25-19, itsinda Gisagara 28-26 na Rubavu ibitego ibitego 27-23 mu gihe yatsinzwe na Musanze ibitego 29-26.
Uretse Karongi yabaye iya mbere, indi myanya ine ya mbere mu bagabo yafashwe na Musanze, Rubavu, Gisagara na Rulindo.
Mu bagore, Musanze yabaye iya mbere nyuma yo gutsinda Bugesera ibitego 31-21, Kayonza 26-21, Nyamasheke 32-18 na Gicumbi 28-14.
Yakurikiwe na Kayonza, Nyamasheke, Bugesera ndetse na Gicumbi.
Ni ku nshuro ya kabiri yikurikiranya Karongi yatwaye Shampiyona mu bagabo mu gihe Musanze yabigezeho bwa gatatu yikurikiranya mu bagore.
