Umuhanzi w’icyamamare muri Afurika y’Iburasirazuba, Joseph Mayanja wamamaye nka Jose Chameleone agiye kongera gutaramira i Kigali nyuma y’iminsi 122 yari ishize abisubitse kubera uburwayi yari amaze igihe bumwibasiye.
Iki gitaramo kizabera muri Kigali Universe ku itariki ya 25 Gicurasi 2025, nk’uko Chameleone yabitangaje. Ni ubwa kabiri atangaje igitaramo muri iyi nyubako, nyuma y’icyari giteganyijwe ku wa 3 Mutarama 2025 ariko kikaza gusubikwa ku munota wa nyuma kubera ikibazo cy’uburwayi.
Ni igitaramo abanyarwanda benshi bamaze igihe bategereje, dore ko aheruka gutaramira i Kigali, ku wa 4 Kanama 2018, ubwo yafatanyaga na DJ Pius mu kumurika album ye yise ‘Iwacu’ mu gitaramo cyabereye muri Camp Kigali.
Ibitaramo uyu muririmbyi akorera hirya no hino birangwa n’ibintu byinshi birimo no kuba akoresha live band, atari playback gusa, bituma abitabiriye igitaramo bumva ijwi rye nyakuri n’ubuhanga bwe mu muziki.
Azwiho kuririmba asimbuka, kubyinira abafana, ndetse rimwe na rimwe akavanga imbyino z’imico itandukanye. Ibi bituma igitaramo kiba gifite imbaraga zishimishije.
Chameleone akunze kuganiriza abafana hagati mu ndirimbo, agatanga ubutumwa cyangwa akanyuzamo agaseka, bigatuma abantu bamwumva hafi.
Mu bitaramo bye, aririmba indirimbo ze zakunzwe cyane nka Jamila, Badilisha, Tubonge, Valu Valu, n’izindi, ariko nanone akanamurika izo amaze gukora vuba.
Akenshi ajyana n’abacuranzi cyangwa ababyinnyi bafite ubunararibonye mpuzamahanga, kandi agenda yerekana ko umuziki we utagira imbibi. Mu bitaramo bimwe, akoresha amajwi cyangwa amashusho agaragaza intangiriro z’urugendo rwe, akibutsa abantu aho yavuye n’aho ageze.
Ibitaramo bye kandi bikunze kuba binini, bigakundwa cyane n’abafana b’ingeri zose, cyane cyane mu bihugu nka Uganda, Kenya, Tanzania n’u Rwanda.
Iki gitaramo kitezweho guhuza abakunzi ba muzika ya Chameleone, by’umwihariko abakunda umuziki wa Afurika y’Iburasirazuba, nyuma y’igihe kinini bari bamutegereje.
