Perezida wa Leta Zunze Ubumwe za Amerika, Donald Trump, yategetse urwego rushinzwe kurinda abayobozi bakuru (Secret Service) kwambura abana ba Joe Biden ababarindira umutekano.
Inshingano za Secret Service ni ukurinda abayobozi bakuru ba Amerika, abahoze bayobora iki gihugu ndetse n’abo mu miryango yabo.
Trump yashinje Biden guha umuryango we umutekano ukabije ndetse no gukingira ikibaba Hunter kugira ngo adakurikiranwa n’ubutabera ku byaha aregwa bijyanye n’imbunda yaguze binyuranyije n’amaregeko ndetse no kunyereza imisoro.
Ku wa 17 Werurwe 2025 Trump yatangarije ku rubuga nkoranyambaga rwe, Truth Social, ko bidakwiye kubona abashinzwe umutekano barenze 18 barinda Hunter, ndetse n’abandi 13 barinda umukobwa we, Ashley Biden.
Ati “Ubu yibereye mu biruhuko ahantu hatandukanye harimo Afurika y’Epfo aho uburenganzira bwa muntu butubahirizwa. Mumenye neza ko ubu ngubu Secret Service itazongera kurindira umutekano Hunter Biden na Ashley Biden.”
Joe Biden yabaye Perezida wa Amerika kuva muri Mutarama 2021 kugeza muri Mutarama 2025. Yasimbuwe na Trump ku butegetsi.
