Perezida Paul Kagame, yatangaje ko abadashyigikiye umutwe witwaje intwaro wa M23 bashyigikiye akarengane kabera mu burasirazuba bwa Repubulika Iharanira Demokarasi ya Congo.
Ni igisubizo yahaye umunyamakuru w’ibiro ntaramakuru AFP by’Abafaransa kuri uyu wa 8 Mata 2024, wari umubajije niba koko u Rwanda rufasha uyu mutwe, n’umubano rwaba rufitanye na wo.
Yagize ati “Abadushinja gufasha M23 nababaza impamvu bo batayifasha? Nawe nk’umunyamakuru wa AFP [nabikubaza]. Kubera iki gufasha cyangwa kudafasha M23 ari ikibazo?”
Perezida Kagame yasobanuye ko M23 ari umutwe ugizwe n’abarwanyi b’Abanye-Congo bavuga Ikinyarwanda barimo abavukiye muri RDC no hanze yaho, kandi ko n’ubutegetsi bw’iki gihugu bubyemera.
Ku kubaho kwa M23, Perezida Kagame yagaragaje ko uyu mutwe wavutse birutse ku itotezwa abawugize bakorewe muri RDC, abenshi barimo ababarirwa mu bihumbi 100 bahungira mu Rwanda mu myaka 20 ishize.
Umukuru w’Igihugu yabwiye uyu munyamakuru ko icyo abantu bakabaye bibaza atari ukuba u Rwanda rwafasha M23 ahubwo ko bakabaye bibaza impamvu bo batayishyigikira.
Ati “Yewe n’abadushinja, nabashinja kudafasha M23 kuko byaba bimeze nk’aho bemera akarengane aba bantu bari gukorerwa. Ubaye utemera ako karengane, wakabaye uzamura ikibazo ‘Kubera iki aba bantu ba M23 bari gufatwa uku’?”
Ikindi kibazo Perezida Kagame yabwiye umunyamakuru ko akwiye kubaza ni impamvu aba Banye-Congo ibihumbi 100 bamaze imyaka irenga 20 ari impunzi mu Rwanda.
M23 yavutse mu 2012 hashingiwe ku masezerano ya tariki ya 23 Werurwe 2009 Leta ya RDC yagiranye n’abarwanyi ba CNDP ariko ntiyayubahiriza. Mu 2013 yaratsinzwe ariko yongera kwisuganya mu mpera za 2021. Kugeza ubu, igenzura igice kinini cy’intara Kivu y’Amajyaruguru.
