Aba-Dj bagezweho muri Afurika y’Epfo Pcee Nxumalo wamamaye nka Pcee na mugenzi we bakorana bya hafi, Justin King uzwi nka Justin99 batumiwe mu Rwanda mu gitaramo cya Intore Sundays.
Aba basore batumiwe na Intore Entertainment, mu bitaramo itegura bihuza aba DJs bakomeye mu Rwanda no hanze yarwo.
Aba basore bombi bahuza kuririmba no kuvanga imiziki. Akenshi indirimbo nyinshi bazihuriramo ndetse ntibasigana kuko bakorana nk’itsinda.
Bahuriye mu ndirimbo nka “ZoTata’’ bahuriyemo n’abandi bahanzi nka EeQue na Mr JazziQ, “Yahyuppiyah” bahuriyemo na Uncle Waffles uheruka nawe gutaramira mu Rwanda umwaka ushize, Tony Duardo na Chley, “Phonela” , “ Sizongena” bakoranye na Michael Kush “Johnny ke Johnny” bahuriyemo na Mr JazziQ , Zan’Ten na Papi_SA n’izindi.
Iki gitaramo Pcee na Justin99 batumiwemo kizaba ku wa 28 Gicurasi 2023. Kizabera kuri Mundi Center Rwandex guhera saa munani z’amanywa kugeza saa tanu z’ijoro.
Kizacurangwamo na Dj Toxxyk, Dj Pyfo, Dj Tyga ndetse na Kevin Klein. Kwinjira ni 10.000 Frw ku bazagura amatike mbere naho abazayagurira ku muryango ni 15.000 Frw. hari n’ameza ya 300.000 Frw ku bantu batandatu bazahabwa n’inzoga.
Iki gitaramo nk’ibisanzwe cyatewe inkunga na Skol Rwanda.
Aba basore bagiye gutarama mu Intore Sundays babisikana n’itsinda rya Soul Natives naryo riheruka mu Rwanda mu mpera z’umwaka ushize.
Hari kandi na DJ Uncle Waffles uheruka mu Rwanda muri Gicurasi 2022.