Umunyafurika y’Epfo Dr Patrice Motsepe yatoreye kuyobora Impuzamashyirahamwe y’umupira w’amaguru muri Africa ku nshuro ya kabiri.
Uyu mugabo w’imyaka 63 yatangiye kuyobora CAF mu mwaka wa 2021, mu Ukwakira 2024 nibwo yatangaje icyemezo cye cyuko azongera kwiyamamariza kuyobora CAF ndetse byanamuhiriye yongera gutorwa.
Inama y’Inteko rusange Idasanzwe ya CAF yabereye i Cairo kuri uyu wa gatatu tariki 12 Werurwe nibwo uyu mugabo yatowe. Ni inama yanitabiriwe n’umuyobozi w’Ishyirahamwe ry’umupira w’amaguru ku Isi FIFA, Gianni Infantino.
Bimwe mu byo yagarutseho Patrice Motsepe yavuze ko yiteguye gukomereza ku byiza yari amaze kugeraho. Hatowe kandi abazahagararira CAF muri FIFA. Ubwo yajyaga ku buyobozi mu mwaka wa 2021 yari asimbuye umunya-Madagascar, Ahmad wanabaye umuyobozi wa mbere wa CAF wari ahagaritswe na FIFA.
Ubuyobozi bwa Motsepe bwaranzwe no kwiyongera kw’amafaranga nkaho mu irushanwa ry’Igikombe cya Africa giheruka cyabereye muri Côte d’Ivoire hinjiye miliyoni 72 z’amadorari nk’inyungu. Uko kwiyongera kwari kuvuze ko byibuze byikubye inshuro 18 ku gikombe cya Africa cyari cyabanje.
Mu bindi byaranze aya matora nuko umunya-Cameroon, Samuel Eto’o yatorewe kujya muri komite nyobozi ya CAF. Mu cyumweru gishize nibwo urukiko ruburanisha imanza za siporo rwagize umwere uyu mugabo wahembwe inshuro 4 zose nk’umukinnyi mwiza wa Africa ubwo yari agikina.
Samuel Eto’o w’imyaka 44 yari yahagaritswe ashinjwa kugira imyitwarire mibi, gusa ubu ibyo bihano yari yahawe byakuweho.
Patrice Motsepe agiye kuyobora indi myaka ine Impuzamashyirahamwe y’umupira w’amaguru muri Africa.
