Kuri uyu wa Kabiri, itariki 11 Gashyantare, ibitangazamakuru mu gihugu byatangaje ko byibuze abantu 52 baguye mu gitero cyagabwe n’inyeshyamba z’umutwe wa CODECO mu majyaruguru y’uburasirazuba bwa Repubulika ya Demokarasi ya Congo.
Uyu mutwe w’inyeshyamba wagabye ibitero ku mugoroba wo kuwa Mbere mu duce dutatu muri Dguju mu ntara iherereye mu majyaruguru y’uburasirazuba bw’igihugu ya Ituri.
Radio Okapi ivuga ko abanyamuryango ba sosiyete sivile yo muri ako gace bavuze ko abantu 52 bishwe, umunani barakomereka, n’amazu 30 aratwikwa bikozwe n’izi nyeshyamba.
Andi makuru yo muri ako gace yavugaga ko abantu 80 baguye muri ibyo bitero.
Ibitero bya CODECO, umutwe witwaje intwaro uvuga ko urengera inyungu z’Abanyekongo b’Aba-Lendu mu kurwanya bakeba babo b’Aba-Hema, bimaze guhitana abasivili babarirwa mu magana kuva mu 2014 mu burasirazuba bwa Congo.
