Ku mugoroba wo ku wa Gatanu Tariki ya 13 Ukuboza 2024 nibwo Ikigo gitunganya filime na Seri Nyarwanda cya Zacu Entertainment kibinyujije muri Televiziyo yacyo ya Zacu Tv ,cyari cyahurije hamwe bamwe mu byamamare muri Sinema muri Kigali City Tower mu birori byo gusoza Umwaka wa 2024 banishimira ibyo bagezeho mu myaka 2 bamaze bakora.
Iki gikorwa cyari kigamije gushimira abakinnyi, abatunganya filime, abafatanyabikorwa, n’inshuti zose bagize uruhare mu bikorwa byabo, ndetse baboneraho no guteguza imishinga mishya izashyirwa mu bikorwa mu mwaka wa 2025.
Ni ibirori byitabiriwe n’abakinnyi bakomeye mu Rwanda, abatunganya filime, n’abandi banyamwuga batandukanye mu ruganda rwa Sinema Nyarwanda.
Mu ijambo ry’Umuyobozi Mukuru wa ZACU Entertainment, Misago Wilson yashimiye uruhare rw’abafatanyabikorwa mu kugera ku ntego zabo, anagaruka ku byagezweho kuva ZACU TV yatangizwa mu mwaka wa 2022.
Yagaragaje ko kuva yatangizwa, ZACU TV yabaye shene ya mbere ikurikirwa mu Rwanda kuri dekoderi za CANAL+. Uyu munsi, ZACU TV ikoresha ibikoresho byo ku rwego mpuzamahanga, byanayifashije gukora filime z’amasaha arenga 150 ku mwaka, ugereranyije n’amasaha 40 batunganyaga muri 2017 ubwo iki kigo cyafunguraga.
Mu bindi byagezweho byishimirwa, ni uko filime za ZACU zikomeje kugera ku rwego mpuzamahanga, aho nk’urugero, seri yitwa The Bishop’s Family yaguzwe na shene ya A+, igashyirwa mu gifaransa.
Mu myaka ibiri ishize, ZACU Entertainment yatanze imirimo ku bantu barenga 300 kandi itanga imisoro irenga miliyoni 120 z’amafaranga y’u Rwanda mu kigega cy’imisoro (RRA).
Ku birebana n’imishinga mishya, Misago yatangaje ko seri Kaliza wa Kaliza, ikinwe mu buryo buvuguruye hashingiwe kuri seri yakozwe na Zee Entertainment, ari imwe mu mishinga izafasha gukomeza kuzamura urwego rwa sinema nyarwanda.
Ni mu gihe mu rwego rw’ubufatanye, ZACU TV irimo gukorana n’abatunganya filime barenga 10 kandi ibiganiro byo kongera umubare w’abafatanyabikorwa birakomeje.
Sophie Tchatchoua, Umuyobozi Mukuru wa CANAL+ Rwanda, na we yatanze ijambo ry’ishimwe no guha agaciro uruhare rwa ZACU mu ruganda rwa sinema nyarwanda, ndetse asobanura byimbitse imbaraga CANAL+ ishyira mu ruganda rwa sinema.
Yagize ati: “CANAL+ n’ikigo cya mbere mu gutunganya ibikorwa byo kwidagadura mu bihugu bikoresha Igifaransa muri Afurika. Ifite ibikorwa mu bihugu birenga 25 ku mugabane wa Afurika, birimo n’u Rwanda. Ifite inzu zitunganya filime muri Afurika, harimo Ivory Coast, Nigeria, n’u Rwanda.
CANAL+ itunganya amasaha arenga 3,500 y’ibikorwa bya televiziyo muri Afurika buri mwaka, harimo n’amaseri ya televiziyo 2,500 hamwe n’amafilime 250.”
Iki gikorwa cyasoje umwaka wa 2024 gituma abareba ZACU TV biteze byinshi mu mwaka wa 2025, by’umwihariko ku mishinga mishya itegurwa mu rwego rwo kwagura ibikorwa bya Sinema Nyarwanda.
Ibyo birori byo kuri uwo mugoroba byari byitabiriwe n’abakinnyi bakomeye muri sinema nyarwanda nka Seburikoko, Siperansiya, Clapton Kibonke, Bamenya, Dogiteri Nsabi na bandi benshi bamaze kubaka izina hano mu Rwanda.
