Perezida Yoweri Museveni wa Uganda, yagize umuhungu we Gen Muhoozi Kainerugaba, Umugaba Mukuru w’Ingabo za Uganda.
Muhoozi yari asanzwe ari umujyanama wihariye wa Perezida mu bijyanye n’ibikorwa bidasanzwe. Asimbuye Gen Wilson Mbadi ku mwanya w’umugaba mukuru w’ngabo za Uganda.
Lt Gen Sam Okiding yagizwe Umugaba Mukuru w’ingabo wungirije, asimbuye Gen Peter Elwelu wagizwe umujyanama wa Perezida, nkuko ChimpReports yabitangaje.
Museveni kandi yazamuye mu ntera abandi basirikare bakuru ndetse anakora impinduka zitandukanye muri Guverinoma.
Muhoozi wagizwe Umugaba Mukuru w’Ingabo za Uganda, asanzwe ahabwa amahirwe yo gusimbura se ku butegetsi, dore ko yatangije igisa nk’ishyaka cyiswe ‘MK Movement’, gikomeje kwigarurira imitima y’urubyiruko.
Amatora ya Perezida ataha ateganyijwe mu 2026, aho amakuru avuga ko Museveni ashobora kutazayagaragaramo.
