Ikipe ya Rayon Sports FC yatsinze Interforce ibitego 4-0, mu mukino ubanza wa ⅛ cy’irushanwa ry’Igikombe cy’Amahoro utagaragayemo Umutoza wayo, Muhamed Wade wahagaritswe.
Uyu mukino wabaye kuri uyu wa Kabiri, tariki ya 16 Mutarama 2024, ubera kuri Kigali Pele Stadium nk’impinduka zabayeho kuko Interforce FC yari kuwakirira kuri Stade y’Akarere ka Bugesera.
Umutoza wongera imbaraga w’Umunya-Afurika y’Epfo, Lebitsa Ayabonga, ni we wari Umutoza Mukuru kuri uyu mukino ariko afatanya na Team Manager, Mujyanama Fidèle.
Umukino ugitangira Rayon Sports yabanjemo abakinnyi benshi basanzwe babanza mu kibuga ku buryo butunguranye yahise ibona igitego ku munota wa kane cyinjijwe na Youssef Rhab ku kazi gakomeye kakozwe na Luvumbu Nzinga.
Igice cya mbere cyarangiye ikipe ya Rayon Sports iyoboye n’igitego 1-0 ndetse inatangira icya kabiri ikora impinduka aho yakuyemo Ishimwe Kevin na Youssef Rhab hajyamo Mvuyekure Emmanuel na Bugingo Hakim.
Nyuma y’iminota icyenda kigitangira Héritier Nzinga Luvumbu yahise atera Coup-franc yabonywe na Rayon Sports yijyana mu izamu ayibonera igitego cya kabiri.
Lebitsa Ayabonga yahise amukura mu kibuga ari kumwe na Tuyisenge Arsene, o hajyamo Ndekwe Félix na Iradukunda Pascal bakina mu kibuga hagati.
Rayon Sports yabonye igitego cya gatatu ku munota wa 87 cyatsinzwe na Mvuyekure Emmanuel ku mupira yari aherejwe na Nsabimana Aimable wagiye mu kibuga asimbuye Camara Alseny.
Mvuyekure yatsinze ikindi gitego ku munota wa kane w’inyongera nyuma yo gusiga ba myugariro ba Interforce bari bahagaze nabi.
Aya makipe yombi azongera guhurira mu mukino wo kwishyura wa 1/8 tariki ya 23 Mutarama 2024, na wo uzabera kuri Kigali Pelé Stadium.
Indi mikino ibanza mu Gikombe cy’Amahoro iteganyijwe ku wa Gatatu
AS Kigali vs APR FC
Vision FC vs Musanze FC
Bugesera FC vs Marines FC
ADDAX FC vs Mukura VS
Kamonyi FC vs Police FC
Gorilla FC vs Kiyovu Sports
Ku wa Mbere
Gasogi United vs Muhazi United
