Dr Mukeshimana Geraldine wahoze ari Minisitiri w’Ubuhinzi n’Ubworozi mu Rwanda, yagizwe Visi Perezida wa IFAD

Dr Mukeshimana Geraldine wahoze ari Minisitiri w’Ubuhinzi n’Ubworozi mu Rwanda, yagizwe Visi Perezida w’Ikigega Mpuzamahanga gishinzwe iterambere ry’ubuhinzi n’ubworozi, IFAD.

Ubutumwa bwahererekanyijwe ku rubuga rwa Twitter kuri uyu wa 1 Kanama 2023, bugaragaza ko umuyobozi ushinzwe iby’itangazamakuru muri IFAD ari we watangaje ko Dr Mukeshimana yahawe izi nshingano.

Dr Agnes Kalibata na we wabaye Minisitiri w’Ubuhinzi n’Ubworozi, ubu akaba ari Umuyobozi w’Ihuriro Nyafurika riharanira impinduka mu buhinzi, AGRA yasubije kuri ubu butumwa avuga ko yishimiye kuzakorana na Dr Mukeshimana.

Yagize ati “Nishimiye kubona ko Dr Mukeshimana Geraldine wari uherutse mu nshingano za Minisitiri w’Ubuhinzi n’Ubworozi mu Rwanda yagizwe Visi Perezida wa IFAD. Byatunejeje. Twiteguye gukorana nawe mu nshingano nshya, jyewe ku giti cyanjye na AGRA Africa.”

Dr Geraldine Mukeshimana yabaye Minisitiri w’Ubuhinzi n’Ubworozi kuva muri Nyakanga 2014. Ysimbujwe Dr Ildephonse Musafiri wari Umunyamabanga wa Leta muri iyi Minisiteri kuva muri Werurwe uyu mwaka.

IFAD ni urwego rushamikiye ku Muryango Mpuzamahanga wita ku biribwa n’ubuhinzi ku isi.

Ni ikigega cyita ku baturage bo mu bice by’icyaro binyuze mu kubongerera ubushobozi bwo kwihaza mu biribwa, kuvugurura imirire mu miryango no kongera umusaruro.

Bafashwa kandi kwigira, kwagura ubucuruzi no guhangana n’imbogamizi z’iterambere ryabo. Kuva mu 1978, imaze gutanga miliyari zirenga 23 z’amadolari nk’impano n’inguzanyo yishyurwa ku nyungu nto.

Hamwe no kuba umubare w’abatuye isi ukomeje kwiyongera bikaba biteganyijwe ko uzagera kuri miliyari icyenda mu 2050, icyuho hagati y’abakize n’abakennye kizarushaho kwaguka. Ni muri urwo rwego IFAD iseruka aho ubukene n’inzara byiganje cyane cyane mu bihugu bikiri mu nzira y’amajyambere.