Umunyarwandakazi Ingabire Diane usiganwa ku igare, ntiyahiriwe n’intangiro ze mu Mikino Olempike, aho yabaye uwa 35 asizwe iminota umunani n’amasegonda 27 n’Umunya-Australia, Brown Grace wegukanye umudali wa Zahabu mu gusiganwa n’igihe buri mukinnyi ku giti cye mu bagore.
Iyi mikino ikomeje kubera i Paris mu Bufaransa aho kuri uyu wa Gatandatu, tariki 27 Nyakanga 2024, ari bwo abahagarariye u Rwanda batangiye guhatana.
Ingabire Diane usanzwe ukinira Canyon Sram Generation yo mu Budage, yari ahanzwe amaso kuri uyu munsi ubwo abakina basiganwaga n’igihe.
Byarangiye uyu-Munyarwandakazi abaye uwa 35 akoresheje iminota 48 n’amasegonda atanu. Ni mu gihe yasizwe iminota umunani n’amasegonda 27 n’Umunya-Australia Brown Grace wegukanye umudali wa Zahabu nyuma yo gukoresha iminota 39 n’amasegonda 38.
Ingabire azakina irindi siganwa ry’ibilometero 158 mu muhanda hamwe n’abandi (Road Race) ku Cyumweru tariki ya 4 Kanama, saa Cyenda i Trocadéro.
Uwihoreye Tufaha wahatanaga mu kurwanisha inkota ya ‘Epée’, yasezerewe mu ijonjora rya mbere atsinzwe n’Umuyapani Miho Yoshimura amanota 15-7 mu mukino wabereye muri Grand Palais kuri uyu wa Gatandatu.
Ku Cyumweru, tariki ya 28 Nyakanga, ni bwo Mwamikazi Jazilla w’imyaka 19, azakina isiganwa ry’amagare yo mu misozi saa Cyenda n’iminota 10. Ni mu gihe Abanyarwanda bazongera guhatana ku wa Gatanu, tariki ya 2 Kanama 2024.
