Chorale de Kigali igeze kure imyiteguro y’igitaramo iri gutegura yise “Voices Harmony” kizaba ku wa Gatandatu tariki 21 Kamena 2025, ahazizihirizwa Umunsi Mpuzamahanga w’Umuziki. Iki gitaramo kizabera kuri Kigali Universe, kikaba ari inshuro ya mbere iyi korali igiye kuhakorera igitaramo.
Uyu mushinga mushya uri mu murongo Chorale de Kigali yihaye wo gutangira gukora ibitaramo byinshi mu mwaka, bitandukanye n’uko abantu bari basanzwe bamenyereye igitaramo kimwe gikomeye kizwi nka “Christmas Carols Concert” kiba mu mpera z’umwaka.
Mu kiganiro n’abanyamakuru cyabereye kuri Kigali Universe kuri uyu wa Kane, tariki 19 Kamena 2025, Umuyobozi wa Chorale de Kigali, Hodari Jean Claude yavuze ko bahisemo gutegura iki gitaramo kugira ngo bifatanye n’abandi mu kwizihiza Umunsi Mpuzamahanga w’Umuziki.
Yagize ati “Twashatse igitaramo cyihariye twereka abantu uko indirimbo ziririmbwa mu buryo bw’umwuga, tunereka ubuhanga buri mu muziki. Twatekereje kukigira muri uku kwezi, dutoranya Kigali Universe nk’ahantu hihariye kandi heza.”
Hodari yavuze ko igihe cyageze abakunzi babo babasaba kongera ibitaramo mu mwaka, aho guhagararira gusa ku cy’Ukuboza. Ni bwo Chorale de Kigali yafashe icyemezo cyo gutangiza ibindi bikorwa bishya birimo iki gitaramo.
Kubera ubuso buto bwa Kigali Universe ugereranyije n’ahandi basanzwe bakorera nka BK Arena, bemeje gushyiraho ibiciro birimo: 20,000 Frw, 40,000 Frw, ndetse n’ameza y’ibihumbi 300 Frw.
Hodari yagize ati “Turashaka kwerekana ko umuziki wanditse ugira agaciro, tukomeza gutanga ibyishimo ku bantu banyuranye. Turateganya ko iki gitaramo kizajya kiba buri mwaka.”
Visi-Perezida wa Chorale de Kigali, Bigango Valentin yavuze ko imyiteguro igeze kure, ndetse ko bazaba bari kumwe n’itsinda rigizwe n’abaririmbyi bagera kuri 97, barimo ab’umwuga n’abafite impano zihambaye mu njyana zose bazakoresha.
Umuyobozi wa 1:55 AM, Kenny Mugarura yavuze ko biteguye kwakira iki gitaramo byihariye, cyane cyane mu rwego rwo gukurura n’urubyiruko rusanzwe rukunda umuziki wa Secular.
Yagize ati: “Ni igitaramo kihariye mu buryo giteguwe, kizazana impinduka mu buryo abantu basanzwe babona ibitaramo bya korali. Kigali Universe ni urubuga rwiza rwo guhuriza hamwe injyana n’ubuhanzi bugezweho.”
Mu ndirimbo zizumvikanamo harimo iz’amadini cyane cyane izo muri Kiliziya Gatolika, ndetse n’izindi zamamaye ku rwego mpuzamahanga, zizatuma iki gitaramo kiba icy’umwihariko mu rugendo rushya Chorale de Kigali yatangiye.
Umunsi Mpuzamahanga w’Umuziki (Fête de la Musique / World Music Day) wizihizwa buri mwaka ku itariki ya 21 Kamena, ugamije guteza imbere umuziki mu ngeri zawo zose, ukozwe n’ababigize umwuga cyangwa abafana b’ikirenga, mu ruhame cyangwa ahantu hatandukanye hadasanzwe.
