Umujyi wa Kigali ugeze kure w’ubuka umudugudu wa Mpazi uherereye mu murenge wa Gitega, mu karere ka Nyarugenge.
Uyu mudugudu ufite umwihariko w’uko uzatwara amafaranga make ugereranyije n’indi, bitewe nuko bahinduye ibikoresho n’uburyo bwo kubaka, aho aya mazu ari kubakwa ahahoze ari ubutaka bw’abaturage bazawutuzwamo.
Abaturage batanze ubutaka bari basanganywe, aribwo bwubatsweho aya mazu. Mu gutuzwa buri muturage azajya ahabwa inzu ingana n’agaciro kubutaka yari ahafite.
Ni umudugudu uzaba ufite irerero ry’abana bakiri bato, isoko ryo guhahiramo, ibibuga byo kwidagaduriramo n’ibindi bizafasha mu mibereho myiza y’abahatuye.
Kugeza ubu imiryango 105 yamaze gutuzwa mu nzu nshya, mu gihe andi mazu 688 akiri kubakwa.
Abaturange batujwe muri uyu mudugudu bishimira amazu bubakiwe kuko azabafasha mu mibereho myiza no gukomeza kwiteza imbere.
Nubwo bishimira gutuzwa neza, hari zimwe mu mbogamizi bagihura nazo zirimo ubushobozi buke bwo kwishyura imodoka zitwara imyanda, n’ubumenyi buke bwo gukoresha bimwe mu bikoresho birimo ubwiherero n’ibindi, bishobora gukoreshwa nabi bikabangamira ubwisanzure bw’abandi.
Kuva mu mwaka wa 2017, Umujyi wa Kigali watangije umushinga wo kubaka amazu agezweho, akomeye kandi ari ahantu habereye gutura, kuva icyo gihe impinduka mu mibereho y’abaturage igenda irushaho kuzamuka.
