Umuryango wa Rayon Sports watangaje ko tariki 16 Ugushyingo 2024, hateganijwe Inama y’inteko rusange yawo izanatorerwamo abayobozi bashya bawo, mu gihe habaye hanashyizweho akanama kayitegura.
Ni inteko rusange igiye guterana nyuma y’igihe benshi bibaza ahazaza h’uyu muryango, nyuma y’aho uwari uw’uyoboye Captain (Rtd) Uwayezu Jean Fidèle yeguye kuri izi nshingano, habura igihe gito ngo manda ye irangire, dore ko yarangiye tariki 24 Ukuboza 2024.
Kugeza ubu, ibyishimo ni byinshi ku banyamuryango ba Rayon Sports n’abakunzi b’ikipe ya Rayon Sports FC by’umwihariko, nyuma y’ibivugwa ko abahoze bayobora iyi kipe bongeye gushyira hamwe ngo bateze imbere iyi kipe ikundwa n’abatari bake.
Ku wa Kabiri tariki 29 Ukwakira 2024, nibwo inkuru yo kuba aba bagabo barimo abatarabonaga ibintu kimwe bahujwe na Minisitiri wa Siporo, Bwana Richard Nyirishema ari kumwe na Perezida w’Ishyirahamwe ry’umupira w’amaguru mu Rwanda (FERWAFA), Bwana Alphonse Munyantwari; baganirizwa uko bakongera gukorera hamwe no gufatanya kugira ngo bateze imbere iyi kipe.
Nyuma yo kuganirizwa, bivugwa ko bahawe umwanya ngo bishakemo akanama kabayobora by’agateganyo ngo bategure imikino iyi kipe ifite mu minsi ya vuba, ndetse banasubiremo amategeko agenga uyu muryango bishyira ku nama y’Inteko rusange; bemeza ko Bwana Paul Muvunyi abayobora, akungirizwa na Sadate Munyakazi batacanaga uwaka, hakaba kandi Gacinya Chance Denys ndetse na Me Zitoni P. Claver ngo abagire inama mu by’amategeko.
Mu itangazo ryasohotse kuri uyu wa Gatatu tariki 30 Ukwakira 2024, Association Rayon Sports yagize iti:
“Ubuyobozi bwa Association Rayon Sports buramenyesha abanyamuryango bawo bose ko buri gutegura inama y’Inteko rusange izaterana ku wa Gatandatu tariki 16 Ugushyingo 2024.”
Iri tangazo rikomeza rigira riti:
“Iyi nama iteganijwemo amatora ya Komite Nyobozi izasimbura komite icyuye igihe yarangije manda tariki 24 Ukwakira 2024. Andi makuru tuzayabamenyesha mu itangazo ritaha.”
Iyi Nteko rusange ije ikenewe, gusa hari abibaza uko amatora azakorwa dore ko kugeza ubu amategeko shingiro ya Rayon Sports avuga ko hatora abayobozi b’amatsinda y’abafana (fan clubs), hakaba hari abavuga ko ibi byahinduka; ni mu gihe kandi iyi kipe izwi ku kazina ka Gikundiro hari igitekerezo ko yashyirwa ku isoko ry’imari n’imigabane
