Uwari umutoza mukuru w’ikipe y’Igihugu ya Sénégal, Aliou Cissé ntakiri muri izo nshingano yari amazemo imyaka icyenda.
Nyuma yo gusoza amasezerano mu kipe y’Igihugu ya Sénégal, Aliou Cissé, nta bwo yigeze yongererwa andi n’Ishyirahamwe ry’Umupira w’Amaguru mu gihugu cya Sénégal.
Nyamara uyu mutoza yahesheje iyi kipe amanota atandatu mu mikino ibiri iheruka gukina mu gushaka itike y’Igikombe cya Afurika 2025 kizabera muri Maroc
Aliou Cissé yabaye umukinnyi ukomeye mu kipe y’Igihugu ya Sénégal. Nyuma yo gusoza gukina nk’uwabigize umwuga, yahise yinjira mu butoza ndetse ahabwa inshingano mu gihugu cye.
Yageze mu kipe y’Igihugu mu 2012. Icyo gihe yari umutoza w’umusigire. Mu 2012-13 yari umutoza wungirije mu kipe y’igihugu y’Abatarengeje imyaka 23. Mu 2013-15 yari umutoza mukuru w’ikipe y’igihugu y’Abatarengeje imyaka 23.
Guhera mu 2015-24, yari umutoza mukuru w’ikipe y’igihugu ya Sénégal. Yayihaye igikombe cya Afurika cya 2022, mu gihe mu 2019 yageze ku mukino wa nyuma w’igikombe cya Afurika. Mu 2022 yajyanye na Les Lions de la Teranga mu Gikombe cy’Isi cyabereye muri Qatar.
