Umuyobozi Mukuru wa Polisi y’u Rwanda (IGP), CG Felix Namuhoranye yakuriyeho abamotari icyemezo bari bamaze igihe barashyiriweho cyo gucana itara rya moto ku manywa igihe cyose bari mu muhanda ndetse no kubahiriza amategeko mu muhanda igihe cyose batwaye abagenzi .
Ibi yabivugiye mu biganiro Polisi n’Umujyi wa Kigali bagiranye n’abamotari kuri uyu wa Mbere tariki ya 25 Werurwe 2024, nyuma y’uko abamotari bagaragaje ko gucana itara amasaha yose bituma amatara ya moto zabo ashya ndetse bibahombya.
CG Felix Namuhoranye, yabwiye abamotari ko guhera kuri uyu wa Mbere bemerewe gucana amatara Saa Kumi n’Ebyiri z’umugoroba kugeza Saa Kumi n’Ebyiri za mu gitondo.
Yagize ati “Guhera none muratangira gucana itara Saa Kumi n’Ebyiri za nimugoroba kugeza Saa Kumi n’Ebyiri za mu gitondo, tugiye gufashanya ntituzogere kubona idacanye itara guhera Saa Kumi n’Ebyiri za nimugoroba kugeza Saa Kumi n’Ebyiri za mu gitondo.”
Yongeyeho ko nihagira abamotari bagaragaraho kutubahiriza aya mabwiriza gahunda yo gucana itara amasaha yose bari mu muhanda izasubizwaho.
Abamotari babwiye IGIHE ko bishimiye iki cyemezo cyo gukurirwaho itegeko ryo gucana amatara igihe cyose bari mu muhanda.
Umumotari witwa Habumugisha Innocet yagize ati “Byaduhombyaga cyane kuko amatara ntiyamaraga igihe yahitaga ashya ku buryo wasangaga nko mu kwezi uguze amatara nk’atatu cyangwa ane.”
Uwitwa Habiyambere Janvier yagize ati “Ntabwo wakumva uburyo nabyishimiye ariko uzi guhora ucanye itara uburyo byaduhombyaga kuko nta muntu mu kwezi utaguraga amatara inshuro ebyiri cyangwa eshatu.”
Meya w’Umujyi wa Kigali,S amuel Dusengiyumva, we yasabye abamotari kurangwa n’isuku no kugira uruhare mu kudahumanya ikirere.
Ati “Turabashimira uruhare mugira mu gutwara abantu no mu kubaka umujyi usukuye kandi utekanye ikindi tubasaba dufatanye mu gutunganya umwuka duhumeka, moto zanyu mugomba kujya muzikoresha zigahumeka neza zikagira isuku mukabuza n’abagenzi kujya bajugunya ibintu aho babonye.”
Yakomeje yizeza abamotari ko bagiye kubashakira indi myambaro kugira ngo barusheho gusa neza no kubashakira ahantu hihariye bazajya bakorera umuganda.
