Umunyamideli kabuhariwe, Kendall Jenner akaba na murumuna wa Kim Kardashian yasubiye mu rukundo n’umukinnyi wa Basketball Devin Booker nyuma y’umwaka umwe bari bamaz batandukanye .
Kendall Jenner umunyamideli uri mubinjiza agatubutse ku Isi, akaba anafite kompanyi ikora ikinyobwa cya ‘Tequila’ kizwi ku izina rya ‘The 818’, amaze amezi atatu atandukanye n’umuhanzi Bad Bunny ukomoka mu gihugu cya Puerto Rico, kuri ubu yongeye gusubirana n’umukunzi we wa kera Devin Booker bari bamaze umwaka batandukanye.
Ni nka bya bindi bavuga ngo ‘amazi arashyuha ntiyibagirwa iwabo wa mbeho’ nibyo byabaye kuri uyu munyamideli Kendall Jenner watandukanye na Devin akajya mu bandi none akaba yongeye ku musubiraho nk’uko TMZ yabitangaje. Aba bombi bari baratandukanye mu Kwakira kwa 2022.
Kendall yasubiranye na Devin bari bamaze umwaka batandukanye
TMZ ivuga ko amakuru y’urukundo rwabo yatangiye kuvugwa muri Mutarama ko Kendall Jenner w’imyaka 28 na Devin Booker w’imyaka 27 ukinira ikipe ya Phoenix Stars biyunze bagasubira mu rukundo dore ko ubwo batandukanaga nta mpamvu ikomeye yabatanyije uretse kuba buri umwe yarahuze ndetse no kuba baba mu mijyi itandukanye ku buryo kubonana byabavunaga.
Iki kinyamakuru gikomeza kivuga ko gusubirana kw’aba bombi bimaze gusa nk’ibimenyerwa kuko mu 2020 bigeze gutandukana amezi 6 bongera gusubirana mu 2021 aribwo batandukanye mu 2022. Mbese ngo urukundo rwabo rwatangiye mu 2019 rurangwamo n’akavuyo ko gutandukana basubirana bya hato na hato.
