Kuri uyu wa Gatatu tariki ya 20 Ukuboza 2023, mu Karere ka Bugesera hatashywe uruganda ruvanga ifumbire rwitwa Rwanda Fertilizer Blending Plant rwuzuye rutwaye miliyari zirenga 24 z’amafaranga y’u Rwanda.
Ni uruganda rwubatswe mu cyanya cyahariwe Inganda cya Bugesera ku bufatanye bw’abafatanyabikorwa batandukanye barimo Ikigega Agaciro Development Fund (AgDF) gofitemo imigabane ingana na 32,6%, Ikigo Rwanda Fertiliser Company Ltd (RFC) gifite 37,4%; Ikigo APTC Ltd cyongerera agaciro umusaruro w’ubuhinzi n’ubworozi mu Rwanda gifitemo 10% n’Ikigo cyo muri Morroco gitunganya ifumbire mvaruganda (OCP Group
Umuhango wo gutaha urwo ruganda ku mugaragaro witabiriwe na Minisitiri w’Ubucuruzi n’Inganda Dr. Jean Chrysostome Ngabitsinze wahagarariye Minisitiri w’Intebe Dr. Edouard Ngirente.
Urwo ruganda rwitezweho kujya ruvanga nibura toni 100,000 z’ifumbire mvaruganda buri mwaka ndetse rukaba ari imbaraga Guverinoma yashyizemo imbaraga kugira ngo he gukomeza gutumiza ifumbire mu mahanga.
Urwo ruganda rwamaze guhabwa ikirango cy’ubuziranenge, ruzagira uruhare mu kubona ifumbire ifite ubuziranenge kuko n’ibikorwa byo kubugenzura umunsi ku wundi bizakomeza gukorwa.
U Rwanda rwungutse uruganda ruvanga ifumbire mvaruganda, mu gihe rumaze igihe kinini ruyitumiza mu mahanga mu rwego rwo kurushaho kongera umusaruro ku butaka buhingwa mu gihugu hose.
Ariko guhera mu mwaka wa 2021, ibiciro by’ifumbire itumizwa mu mahanga byarushijeho gutumbagira kubera ikiguzi cy’ubwikorezi n’ibibazo by’intambara mu bihugu bisanzwe biyitunganya.
Minisiteri y’Ubuhinzi n’Ubwirozi (MINAGRI), ivuga ko ikoreshwa ry’ifumbire mvaruganda ryavuye ku kigero cya 29,917 kikagera kuri toni 43, 757 mu mwaka wa 2021, bivuze ko yiyongereye ku kigero cya 46% ugereranyije n’umwaka wa 2020.
Ubwiyongere bw’ifumbire mvaruganda yateganyirizwaga kwiyongera ku bilo 51 kuri hegitari mu 2020/21, ibilo 60 mu 2021/22, ibilo 65 mu mwaka wa 2022/23 n’ibilo 75 mu mwaka wa 2024.
