Rayon Sports yasinyishije Rutahizamu w’Umunya-Guinée, Alsény Camara Agogo, amasezerano azarangirana n’uyu mwaka w’imikino wa 2023/24.
Uyu mukinnyi yari amaze ibyumweru bibiri mu igeragezwa, bityo abatoza bashima urwego rwe.
Kuri uyu wa Kane, tariki 7 Ukuboza 2023, ni bwo yahawe amasezerano y’amezi atandatu ahwanye n’igice cya kabiri cya shampiyona.
Alseny Camara yakiniye amakipe nka Kaloum na Horoya AC iwabo muri Guinée, ASAC Ndiambour, Sacré-Coeur na Guediawaye FC muri Sénégal ndetse na Hassania d’Agadir yo muri Maroc.
Uyu rutahizamu w’imyaka 28 yari mu igeragezwa hamwe n’Umunye-Congo, Mabiala Kinkela, ariko we yamaze gusezererwa nyuma y’aho urwego rwe rudashimwe.
Rayon Sports ikomeje ibiganiro byo kongerera amasezerano Rutahizamu w’Umunya-Uganda, Musa Esenu, ugomba gusoza ayo afite muri Mutarama.
