Ikipe ya Santos FC isanzwe ari ubukombe muri Brésil yamanutse mu Cyiciro cya Kabiri nyuma y’imyaka 111 ikina mu cya mbere aho kuri ubu yasoje Shampiyona iri mu makipe ane ya nyuma.
Bidasubirwaho, iyi kipe yamanutse mu rukerera rwo ku wa Kane tariki 7 Ukuboza 2023, nyuma yo gutsindirwa mu rugo na Fortaleza ibitego 2-1, byatumye isoza shampiyona iri ku mwanya wa 17 n’amanota 43.
Shampiyona y’Icyiciro cya Mbere muri Brésil ikinwa n’amakipe 20, ane ya nyuma akaba ari yo amanuka mu Cyiciro cya Kabiri. Muri uyu mwaka hamanutse amakipe nka Santos FC yabaye iya 17, Goiás Esporte Clube ya 18, Coritiba ya 19 ndetse na América Futebol Clube yabaye iya nyuma.
Iyi nkuru yaciye igikuba mu isi y’umupira kuko Santos FC ni ikipe y’amateka bivugwa ko ari na yo imaze gutsinda ibitego byinshi ku Isi.
Si ibyo gusa kuko yazamukiyemo abakinnyi bakomeye nka Edson Arantes do Nascimento wamamaye nka Pelé, Neymar Junior de Santos, Robinho na Rodrygo ukinira Real Madrid.
Muri rusange, Palmeiras yegukanye Igikombe cya Shampiyona ku nshuro ya kabiri yikurikiranya, iyobowe na rutahizamu w’imyaka 17, Endrick Felipe Moreira de Sousa wamaze kugurwa na Real Madrid azerekezamo mu mpeshyi y’umwaka utaha.
