Capt. Moussa Dadis Camara, wahiritse ubutegetsi muri Guinée mu 2008, agatoroka gereza yari afungiyemo mu mpera z’icyumweru gishize, yongeye gufatwa arafungwa.
Yari yatokorokeshejwe mu gitondo cyo ku wa Gatandatu tariki ya 4 Ugushyingo 2023, aho i Conakry haramutse humvikana amasasu menshi.
Uwo munsi imodoka za gisirikare ndetse n’Ingabo zibarizwa mu mutwe ushinzwe kurwana aho rukomeye, zagaragaye mu mihanda ndetse urusaku rw’amasasu rwumvikanye hafi y’agace gakoreramo inzego za leta ahitwa Kaloum.
Ntabwo biramenyekana niba Capt. Dadis Camara yaba yari yashimuswe cyangwa kwari ugutorokeshwa gereza n’abari bamushyigikiye.
Umunyamategeko we yabwiye BBC ko yavanywe muri Gereza atabishaka kandi ko adashobora kugerageza gutoroka kuko yizeye ko ubutabera bwa Guinée buzakora akazi kabwo.
Nyuma y’inkuru y’uko Camara yatorokeshejwe, imipaka y’igihugu yahise ifungwa, inzego zitangira kumushakisha n’abo bari batorokanye gereza.
Ureste Moussa Camara, abandi batorokanye bamaze gufatwa.
Barimo Claude Pivi wari Minisitiri w’Umutekano ku ngoma ya Dadis Camara; Blaise Goumou na Moussa Thiégboro.
Abo bose bafunzwe bashinjwa ubwicanyi bwabaye mu gihugu ku wa 28 Nzeri 2009 bwaguyemo abantu 157.
Capt. Moussa Camara akurikiranyweho kuba ari we watanze itegeko ku basirikare bagize uruhare muri ubwo bwicanyi.
Col Moussa Dadis Camara yahise ayobora igihugu kuva ku wa 24 Ukuboza 2008 kugeza ku wa 15 Mutarama 2010.
Uyu mugabo w’imyaka 59 yaje guhunga ajya muri Burkina Faso kubera ibirego yashinjwaga, mbere y’uko agaruka mu gihugu ngo agashyikirizwa inzego z’ubutabera.
Uyu mugabo kimwe na bagenzi be bahakana ibyo bashinjwa bivuye inyuma.
Guinée ubu iyoborwa Col Mamady Doumbouya, wagiye ku butegetsi mu 2021. Ni kimwe mu bihugu umunani byo muri Afurika y’Uburengerazuba no Hagati byabayemo coup d’état mu myaka itatu ishize. Mali, Niger, Burkina Faso, Tchad na Gabon byose biyoborwa n’abasirikare bahiritse ubutegetsi.
