Ikipe ya APR FC ikina Shampiyona y’icyiciro cya mbere mu Rwanda yamenye amakipe izahura nayo mu mikino ya CAF Champions League ya 2023-2024.
Kuri uyu wa kabiri tariki 25 Nyakanga,guhera saa Saba ku biro bikuru by’impuzamashyirahamwe y’umupira w’amaguru muri Afurika (CAF) i Cairo mu Misiri ,habereye tombora y’uko amakipe azahura mu mikino ny’Afurika ihuza amakipe yitwaye neza iwayo ya CAF Confederation Cup ndetse na CAF Champions League ya 2023-2024.
APR FC ihagaririye u Rwanda mu mikino ya CAF Champions League yahise itombora kuzakina na Gaadidka yo muri Somalia mu ijonjora ry’ibanze.
Ikipe izakomeza hagati y’izi zombi izahita icakirana na Pyramids yo mu gihugu cya Misiri. APR FC yabonye itike yo guhagararira u Rwanda mu mikino ya CAF Champions League nyuma yo kwegukana igikombe cya shampiyona irusha Kiyovu Sports yayikurikiraga inota 1 gusa.
Iyi mikino y’ijonjora ry’ibanze muri CAF Champions League biteganyijwe ko tariki 18 na 19 Kanama 2023 aribwo hazakinwa imikino ibanza naho hagati ya tariki 25 na 26 Kanama 2023 hakinwe iyo kwishyura.
