Kenya yohereje uwahoze ari Minisitiri w’Intebe, Raila Odinga, muri Sudani y’Epfo nk’intumwa idasanzwe yo gufasha guhosha amakimbirane yongeye kubura hagati ya Perezida Salva Kiir na mukeba we umaze igihe kinini bahanganye akaba na Visi Perezida wa mbere, Riek Machar, ashobora gusubiza igihugu mu ntambara.
Ishyaka rya Machar rivuga ko afungiwe mu rugo mu murwa mukuru Juba kuva mu ijoro ryo ku wa Gatatu, binyuranyije n’amasezerano y’amahoro yo mu 2018 yarangije intambara y’abenegihugu y’imyaka itanu yazanye aba bagabo bombi muri guverinoma ihuriweho ariko ijegajega.
Ubuyobozi bwabo bwatinze gushyira mu bikorwa ingingo z’ingenzi z’amasezerano y’amahoro, nk’amatora y’igihugu no guhuriza ingabo zabo zombi mu gisirikare kimwe.
Ifungwa rya Machar ryegereje “igihugu intambwe imwe imbere yo gusubira mu ntambara y’abenegihugu”, nk’uko byatangajwe n’umuvugizi w’Umunyamabanga Mukuru w’Umuryango w’Abibumbye, Antonio Guterres.
Ishyaka rya Machar rihakana ibirego guverinoma ivuga ko ishyigikiye Inyeshyamba za White Army, umutwe ushingiye ku bwoko ahanini ugizwe n’urubyiruko rw’Aba-Nuer, wagonganye n’ingabo mu Mujyi wa Nasir uherereye mu majyaruguru y’uburasirazuba muri uku kwezi, bikaba byarateje ikibazo cya politiki gihari ubu.
Mu rwego rwo gusubiza, ingabo za Kiir zegeranije benshi mu bafatanyabikorwa bakomeye ba Machar, barimo minisitiri w’ibikomoka kuri peteroli ndetse n’umuyobozi wungirije w’ingabo.
Ingabo z’abo bagabo bombi kandi ziherutse gukozanyaho mu minsi yashize, hanze ya Juba, n’ahandi.
Perezida wa Kenya, William Ruto, uyobora Umuryango wa Afurika y’Iburasirazuba (EAC), yavuze ko yavuganye na Perezida Kiir ku bijyanye n’ifungwa rya Machar, kandi ko agiye kohereza intumwa idasanzwe kugira ngo ifashe guhosha umwuka mubi no gutanga raporo.
