Polisi y’Igihugu kuri uyu wa Gatatu tariki ya 18 Kamena, yatangaje ko umuhanda uva mu mujyi wa Kigali werekeza mu Gakenke utari nyabagendwa, kubera impanuka yabereye ahitwa muri Buranga.
Polisi yemeje aya makuru biciye mu butumwa yanyujije ku rubuga rwayo rwa X.
Yagize iti: “Muraho! Turabamenyesha ko kubera impanuka y’ikamyo yabereye ahitwa Buranga, mu kagari ka Rusagara, umurenge wa Gakenke, akarere ka Gakenke, umuhanda Kigali-Gakenke utari nyabagendwa muri aka kanya.”
Polisi y’Igihugu yasabye abakoresha uwo muhanda kwihangana mu gihe imirimo yo gukuramo ikamyo yaguye mu muhanda ikomeje.
Si ubwa mbere ikamyo igwa mu muhanda wa Gakenke, kuko no mu myaka itatu ishize hari impanuka yabereye hafi y’ahahoze ibiro by’Akarere ka Gakenke mu Murenge wa Nemba, ahagana saa moya z’igitondo, na bwo umuhanda umara amasaha menshi ufunze.
