Ikigo cya BILT LLC cy’umunyarwenya w’icyamamare muri Leta Zunze Ubumwe za Amerika, Steve Harvey n’u Rwanda basinyanye amasezerano y’imikoranire no guteza imbere ubukerarugendo n’ishoramari mu Gihugu.
Ni amasezerano yashyizweho umukono n’Umuyobozi Mukuru w’Urwego rw’Igihugu rw’Iterambere, RDB, Francis Gatare n’uyu munyarwenya Steve Harvey, kuri uyu wa mbere, tariki ya 16 Ukuboza 2024.
Aya masezerano azibanda ku ngeri zitandukanye zirimo kongerera ubumenyi abari mu ruganda rwa sinema, abari mw’itangazamakuru, uburezi n’ibindi.
Iki gikorwa kibaye nyuma y’uko mu kiganiro Steve Harvey yagiranye na RBA, yavuze ko we n’ikipe ye bafite gahunda yo kuzana ibikorwa by’ubucuruzi mu Rwanda, bizatanga imirimo by’umwihariko ku rubyiruko.
Ati” Dufite byinshi byo gukora by’umwihariko hano mu Rwanda, aha ni ahantu hihariye ntekereza ko twahakorera ibikorwa by’ubucuruzi, kandi ni nabyo turimo n’ikipe yanjye hano, turi kugirango tubyaze umusaruro amahirwe y’ishoramari ahari, kuko ibyo bizafasha mu guhanga imirimo no kwitanga.”
Steve Harvey yagaragaje ko icyo bagamije ari uguha amahirwe urubyiruko kugirango rubyaze umusaruro ubumenyi rufite, ndetse n’igihugu bikibyarire inyungu, ndetse yongeraho ko Umugabane wa Afurika ufite amahirwe kuko abawutuye biganjemo urubyiruko.
