Irushanwa rya ‘SupraModel Competition’, rigamije guteza imbere abari mu ruganda rw’imideli no kumenyekanisha ubukerarugendo; rigiye kuba ku nshuro ya gatatu.
Ibi bihembo bitegurwa na SupraFamily Ltd isanzwe itegura amarushanwa atandukanye ateza imbere impano nka Supra Voice, Rwanda Influencers Award n’andi.
Nsengiyumva Alphonse Umuyobozi Mukuru wa SupraFamily Ltd itegura ibi bihembo, yadutangarije ko hazahembwa abanyamideli batandukanye bakizamuka.
Aba bazaba barimo Best female Model [Umunyamideli w’umugore uhiga abandi], Best Male Model [umunyamideli w’umugabo uhiga abandi] ndetse na People Choice Model[uwatowe cyane kurusha abandi].
Umunyamideli w’umugabo n’uw’umugore wahize abandi bazatoranywa hagendewe ku mpano yabo mu kumurika imideli, naho People Choice Model azaba uwatowe na benshi. Kwiyandikisha byaratangiye.
Hazahembwa kandi Overall Winner uzaba wahize abandi uyu ashobora kuba umukobwa cyangwa umuhungu akazahembwa igihembo nyamukuru cya miliyoni 1 Frw ndetse no kwitabira amarushanwa mpuzamahanga.
Uwiyandikisha asabwa kohereza ifoto ye, amazina ye, imyaka ndetse n’uko areshya n’ibiro bye. Kwiyandikisha bizasozwa 15 Kanama hahite hatangira amatora yo kuri internet.
Abanyamideli bazaba bahize abandi muri bazatoranywa ku wa 15 Nzeri 2024. Umwaka ushize Umutesi Li Hua Brenda niwe wahize abandi bari bahatanye 19.
