Umukinnyi w’Ikipe y’Igihugu y’u Rwanda y’umupira w’amaguru, Amavubi, Bizimana Djihadi yaguzwe n’ikipe yo mu Cyiciro cya Mbere mu gihugu cya Israël.
Uyu mukinnyi ukina hagati mu kibuga afasha ba myugariro, agiye kujya gukina muri Hapoel Ramat Gan Givatayim FC yo mu Cyiciro cya Mbere muri iki gihugu.
Ibi byatangajwe na Ambasaderi wa Israë mu Rwanda, Dr. Ron Adam abicishije kuri Twitter ye.
Yagize ati “Nakiriye kapiteni w’Amavubi, Djihadi Bizimana ugiye kwerekeza muri Israël muri Hapoel Ramat Gan Givatayim FC. Ndakwifuriza amahirwe masa no kuryoherwa no kuhaguma.”
Djihadi yaherukaga muri Deinze yo mu Cyiciro cya Kabiri mu Bubiligi, yari yagiyemo avuye muri Waasland Beveren na yo ikina muri icyo Cyiciro.
Mu Rwanda yakiniye amakipe arimo Étincelles FC y’iwabo i Rubavu, Rayon Sports na APR FC.
